In ricordo di CICCIO VIAPIANA

IN RICORDO DI CICCIO VIAPIANA

Vogghju ‘ma Ti ricordu accussì….

Vogghju ‘ma Ti ricordu accussì, parrandu in dialettu, parrandu d’o dialettu cchi Tu tantu amavi e cchi fu l’urtimu argomentu d’a vita Tua. Ancora non riesciu ‘ma mi capàcitu, m’ìzavi ppemma nèsciu d’a sala ppe’ na telefonata, Ti lassavi cchi stacivi lejendu l’urtimi righi….e poi quandu tornavi intru Ti trovavi svenutu, ccu tutti l’amici tornu tornu cchi si disperàvanu ppe’ Tia.

T’avivi cangiatu l’occhjali ridendu ppemma leji chiddhu cchi avivi scrittu; “ ‘u scrissi ppe’ nomma m’emozionu” dicisti. Eri sempa scrupolosu e dicivi “ Guagliò brutti figuri on d’avìmu ‘e fara!”

Tranquillu, Cicciu, on da facisti mai brutti figuri, ppecchì fusti sempa misuratu e mai volgare, professionale e mai arruffuna, precisu e umile e ccu na parola giusta a lu mumentu giustu….

Vogghju ma Ti ricordu vestutu ‘e prèvita, nt’a “Vucca è na ricchizza” , quandu subba u palcoscenicu ti girasti versu i quinti ma cerchi a mia cchi t’avia ligatu ‘a stola cc’u spilletti…. Non perdisti ‘a calma, ma da grande attore, borbottasti fuori copione contro quel monello del sagrestano……Chjacchjariàvamu sempa, e ni divertiamu facendu divertira….

Vogghju ma Ti ricordu scarparu, sedutu a lu ccippareddhu della Tua “Quandu u diavulu t’accarizza” e quandu cumandavi ‘a seduta spiritica cc’u arta sopraffina e quandu u ventu t’astutava u luminu tu prontu: “Ventu hjuhhjandum micciu astutandum” Cchi cosa fina…..

Vogghju ma Ti ricordu vestutu ‘e oste nt’a “ Giangurgolo”, cchi spagnoleggiavi ccu mia… nt’a processiona d’a Naca vestutu’’e Cavaliere di Malta, vogghju ma Ti ricordu cchi, ccu tantu amura e devoziona,costruivi “U prisebbiu” nt’o Viscuvatu, cchi recitavi ‘nzema a li guagliuni cchi mbizzasti all’arta d’o teatru.

Ma non eri sulu chissu Tu, eri n’artigianu cchi tutti canuscìanu e stimavanu e fusti nu Patra e nu Maritu amatu e rispettatu.

Vogghju ma ti ricordu accussì ppecchì vogghju ma cancellu ‘e l’occhj mei l’urtimi momenti cchi ti mungivi u pettu ccu ‘a speranza ca aperivi l’occhj e mi guardavi, mungia e pregava, e poi ancora ccu i figghj toi vicini in silenziu a pregara.

Caru Cicciu, non bastaru i preghieri e l’amura d’e medici cchi tentaru ccu tutti mezzi ma ti fannu restara ccu nui…

Ni lassasti dicendu ca u dialettu non ha de morira…..Cch’è strana ‘a vita, on ci vo’ nenta….

Sugnu sicuru ca sarà ancora cchjù randa l’impegnu ppemma mantenimu l’urtima promessa cchi ni lassasti e sugnu sicuru ca non ni i scordamu ‘e Tia; i catanzarisi e cui Ti canuscetta non si po’ scordara ‘e Ciccio Viapiana, non si scòrdanu i galantomini e i figghj umili e devoti ‘e ssa’ città cchi tantu amavi e cchi tantu cci dunasti. Ciau Ciccio.

Enzo Colacino portavoce CATANZARO NEL CUORE

Forum delle Associazioni Culturali Catanzaresi